Seoladh leabhair agus léamh filíochta
‘Ceolfhoireann cheilte é m’anamsa,’ a dúirt an mórfhile Portaingéalach Fernando Pessoa agus deirtear go minic gurb iad an ceathrar filí Portaingéalacha is mó ata ann ná Fernando Pessoa: ciallaíonn ‘pessoa’ ‘pearsa’ agus bhí triúr pearsan aige, Albero Caeiro, Ricardo Reis agus Álvara de Campos. Scríobhdar go léir saothar nach raibh sé féin in ann a chumadh, dar leis. Sárshaothar próis le Pessoa is ea Leabhar an Mhíshuaimhnis, a chuaigh i bhfeidhm ar George Steiner sa tslí a dtéann Baile Átha Cliath Joyce nó Prág Kafka i bhfeidhm orainn.
Thug an file Deirdre Brennan cuairt ar Liospóin sa bhliain 2011 agus chuaigh Pessoa go mór i bhfeidhm uirthi. Tá mar thoradh ar an gcuairt sin As Trunc Fernando Pessoa againn, leaganacha gleoite de shaothar an fhile:
Níl difríocht ar bith idir mise is na sráideanna seo
Ach gur sráideanna iad agus is anam mise
Nach mbaineann sin le hábhar b’fhéidir nuair a mhachnaímid
Ar bhunbhrí an ruda.
AS TRUNC FERNANDO PESSOA
DÉ CÉADAOIN 14 DEIREADH FÓMHAIR 6.00pm, Seomra na Gaeilge, Ollscoil na Tríonóide/Trinity College Dublin
Saorchead isteach
